ចិត្តទឹករំលត់ចិត្តភ្លើង

១. មហាត្មៈ គន្ធី ពោលថា “ចិត្តភ្លើងពុំអាចយកចិត្តភ្លើងទៅរំលត់បានឡើយ តែយើងត្រូវប្រើចិត្តទឹក”។ ទ្រឹស្តីពុទ្ធនិយមបង្ហាញថា “អកុសលពុំអាចឈ្នះលើកុសលបានឡើយ”។

២. ពេលគ្មានបញ្ហាសោះ ខ្ញុំមើលទៅយុវជនខ្លះដូចអស្ចារ្យ។ ពេលមានបញ្ហាខ្លះៗ ខ្ញុំមើលទៅយុវជនខ្លះដូចនៅគ្រាន់បើ។ ប៉ុន្តែ ពេលជួបបញ្ហាធំមែនទែន ទើបខ្ញុំដឹងច្បាស់ថា ទាំងចំណេះដឹងផ្នែកច្បាប់ ទាំងក្រមសីលធម៌សង្គម ទាំងអ្នកដែលអះអាងថាខ្លួនជាអ្នកធ្វើសមាធិវិបស្បនា សុទ្ធតែបានកំពុងបង្ហាញចរិតពិតនិងធាតុពិតរបស់ខ្លួនទាំងអស់។ តើអ្នកណានឹងអាចទប់ទល់នឹងខ្យល់ព្យុះនេះបាន?

៣. ពីអំណេះតទៅ សង្គមត្រូវការយុវជនដែលមានធាតុទឹក ដើម្បីរំលត់ភ្លើង។ យុវជនដែលមានធាតុទឹក ត្រូវដើរតួនាទីជាអ្នកដុះលុបវប្បធម៌នយោបាយទុច្ចរិតចាស់។ ពីនយោបាយអសីលធម៌ ទៅជានយោបាយសីលធម៌ប្រកបដោយយុទ្ធសាស្រ្ត។ ពីនយោបាយប្រមាថ ទៅជានយោបាយឱ្យតម្លៃគ្នា។ ពីនយោបាយបែកបាក់ ទៅជានយោបាយសាមគ្គី។ ពីនយោបាយអារម្មណ៍និយម ទៅជានយោបាយគោលការណ៍និយម។ តើយុវជនធាតុទឹកនេះ ត្រូវការលក្ខណៈសម្បត្តិដូចម្តេចខ្លះ?

៤. សង្គមត្រូវការយុវជនដែលមានកម្រិតនៃភាពជាអ្នកដឹកនាំខ្ពស់បំផុត មានទាំងចំណេះដឹងនិងសីលធម៌ខ្ពស់ មានឧបាយបញ្ញាជ្រៅ មានការអត់ធ្មត់ខ្ពស់បំផុត មានការលត់ដំចិត្ត និងប្រើគោលការណ៍ជ្រកក្រោមទង់ជាតិតែមួយ។ ស៊ូទៅយឺតប្រសើរជាង មិនទៅ។ ស៊ូមិនទៅ ប្រសើរជាងទៅទាំងខ្វាក់ងងឹតងងុល។ ដើរផ្លូវឆ្ងាយត្រូវការគ្នាច្រើន។ ដើរផ្លូវឆ្ងាយត្រូវការអ្នកដែលស្មោះស្មគ្រនឹងទស្សនវិស័យ។ អ្នកដើរដែលខ្លាំង គឺជាអ្នកដើរដែលមានលក្ខណៈសម្បត្តិដូចមហាត្មៈ គន្ធី ដូចម៉ាទីន លូធឺឃីង...។ល។

៥. យើងមិនអាចមានយុវជនខ្លាំងក្នុងថ្ងៃនេះ តែយើងអាចរៀបចំយុវជនថ្ងៃនេះឱ្យខ្លាំងសម្រាប់ថ្ងៃស្អែក។ យើងមិនអាចគ្រប់គ្រងស្ថានការណ៍ថ្ងៃនេះបាន តែយើងអាចរៀនសូត្របានពីស្ថានការណ៍ថ្ងៃនេះ ហើយមិនបណ្តោយឱ្យប្រវត្តិសាស្រ្តថ្ងៃស្អែកជាន់ដានថ្ងៃនេះ។ ត្រឹមតែវប្បធម៌នយោបាយថ្មី គឺមិនទាន់ត្រឹមត្រូវទេ ពីព្រោះគ្រាន់តែ “ថ្មី” មានច្រើនរបៀប។ យើងត្រូវការវប្បធម៌នយោបាយថ្មី បូកនឹងត្រឹមត្រូវ ដែលអាចយកជាគំរូបាន និងពោពេញទៅដោយទស្សនវិស័យត្រឹមត្រូវ៕

_____
ទស្សនៈក្នុងរូបភាពបានយកចេញពីសៀវភៅ “ប្រតិទិនទស្សនៈ ៣៦៥ថ្ងៃ”